STEPPENEWS.KZ: Астана қаласының әкімдігі елордадағы жеңіл рельстік көлікпен (LRT) жолаушылар мен жүкті тасымалдау тарифіне қатысты қаулы жобасын «Ашық НҚА» порталында жариялады. Құжатта жаңа көлік түріндегі жол жүру құны мен төлем жасау тәртібі нақты көрсетілген.
Жобаға сәйкес, жеңіл рельстік көлік желісінде бір сапарға билет құны 200 теңге деп белгіленген. Жолаушылар жол ақысын қолма-қол ақшамен де, қолма-қол ақшасыз тәсілдермен де төлей алады. Бұл тарифтік жоспар алдағы уақытта қаланың көлік жүйесіне толық енгізілмек.
Сонымен қатар, елордалық мәслихаттың 2017 жылғы 20 шілдедегі шешіміне сәйкес, Астанада тіркелген және тұрақты тұратын жекелеген санаттағы азаматтар үшін жеңілдіктер сақталады. Бұл топқа жататын тұрғындар қоғамдық көліктегі төлемнен толық босатылған, яғни олар үшін LRT-мен жүру тегін болады. Қазіргі уақытта бұл жоба қоғамдық талқылау сатысында тұр.
