Басқұдық ауылында құқық қорғау органдары Kia Cerato көлігінің жүргізушісін ұстады. Облыстық полиция департаментінің мәліметінше, ол тоқтату кезінде көліктің терезесінен есірткі салынған түйіншектерді лақтырып құтылуға тырысқан. Бұл туралы Azattyq Rýhy агенттігі Lada.kz-ке сілтеме жасап хабарлайды.
Қажетті сараптамалар мен тергеу шаралары жүргізілгеннен кейін полиция 23 қазанда «Қарасора-2025» және «Құқықтық тәртіп» жедел іс-шаралары барысында ұсталған жүргізушіге қатысты мәліметтерді жариялады.
Шамамен сағат 11:38-де есірткі қылмыстарына қарсы күрес басқармасының қызметкерлері Маңғыстау облысы Мұнайлы ауданының Басқұдық ауылында Kia Cerato автокөлігін тоқтатқан.
Ұстау кезінде жүргізуші көліктің терезесінен үлкен түйіншекті лақтырып жіберген. Бұл әрекет бейнекамераға түсіп қалған.
Оқиға орнын тексеру барысында полиция қызметкерлері ақ түсті ұнтақ тәрізді зат салынған, «zip-lock» үлгісіндегі 26 түйіншекті тауып, тәркілеген. Алдын ала мәлімет бойынша, бұл синтетикалық есірткі — мефедрон, жалпы салмағы шамамен 13 грамм.
Сонымен қатар, тінту кезінде ұсталған азаматтың үйінен тағы да екі түйіншек табылған. Онда алдын ала болжам бойынша альфа-PVP есірткі заты болған. Бұдан бөлек, фольга, 200 дана «zip-lock» қалтасы, изолента, электронды таразы және есірткіні буып-түюге дайындықты аңғартатын өзге де заттар анықталды.
Медициналық куәландыру нәтижесінде ұсталған адамның есірткі қолданбағаны анықталған.
Аталған дерек бойынша ҚР Қылмыстық кодексінің 296-бабының 4-бөлігі (Есірткі заттарын өткізу мақсатынсыз аса ірі көлемде заңсыз сақтау) бойынша сотқа дейінгі тергеу басталды.
Ер адам үш жылдан жеті жылға дейін бас бостандығынан айырылуы мүмкін.