Алматы әкімі Дархан Сатыбалды Республика алаңында аяқталған қайта жаңғырту жұмыстарының нәтижесімен танысты. Сондай-ақ жұмыс сапары барысында Сәтбаев көшесінің Байзақов көшесінен Луганский көшесіне дейінгі аралығын кешенді көркейту жобасының іске асырылу барысы қаралды.
Қаланың басты қоғамдық кеңістіктерінің бірі саналатын Республика алаңын жаңарту жобасының тұжырымдамасын Ұлыбританияның Лондон қаласындағы LDA Design компаниясы әзірледі. Жобаны Алматы қаласының Қоғамдық кеңістіктерді дамыту басқармасы «қасбеттен қасбетке дейін» қағидаты бойынша жүзеге асырды.
Қайта жаңғырту жұмыстары 4,5 гектар аумақты қамтыды. Жобаның негізгі мақсаты – тұрғындар үшін қауіпсіз, жайлы әрі жаяу жүргіншілерге қолайлы қоғамдық кеңістік қалыптастыру.
Жоба аясында алаңның жабындары толық ауыстырылып, инженерлік желілер, сыртқы жарықтандыру және автоматтандырылған суару жүйесі жаңартылды. Құрылыс кезінде ұзақ жыл қызмет ететін заманауи материалдар пайдаланылды.
Көгалдандыруға ерекше көңіл бөлінді. Алаңға 233 ірі ағаш, 63 мыңнан астам бұта және 17,7 мың көпжылдық өсімдік отырғызылды. Сонымен қатар көгал төселіп, жасыл аймақтарға сәулеттік жарықтандыру орнатылды. Аумақта 129 жаңа жарық шамы іске қосылды.
Тұрғындардың демалысына қолайлы жағдай жасау үшін балалар ойын алаңдары, серуендеу жолдары, демалыс орындары және екі амфитеатр салынды. Сонымен бірге велосипед жолақтары салынып, олар алдағы уақытта Сәтбаев көшесі бойындағы бірыңғай веложол желісіне қосылады.
Алаңға орындықтар, қоқыс жәшіктері, велосипед тұрақтары, үстелдер, креслолар және басқа да шағын сәулет нысандарын қамтитын 500-ден астам көріктендіру элементі орнатылды.
Жаңартылған алаңның басты ерекшеліктерінің бірі – сегіз сәндік су айдыны. Бұдан бөлек, бұрынғы субұрқақтар күрделі жөндеуден өткізіліп, жаңа субұрқақ кешендері салынды.
Көлік және жаяу жүргінші инфрақұрылымы да жетілдірілді. Сәтбаев көшесінде жаңа қоғамдық көлік аялдамасы пайдалануға берілді. Қосымша бағдаршамдар орнатылып, реттелетін жаяу жүргіншілер өткелдері жасалды. Сондай-ақ халықтың барлық санатына қолжетімді кедергісіз орта қалыптастырылды.
Қала әкімдігінің мәліметінше, жоба толық аяқталғаннан кейін Сәтбаев көшесі бойында біртұтас заманауи қоғамдық кеңістік пайда болады. Ал жаңарған Республика алаңы алматылықтар мен қала қонақтарының серуендеуіне, спортпен шұғылдануына және мәдени-көпшілік іс-шаралар өткізуіне арналған маңызды демалыс орнына айналады.
