STEPPENEWS.KZ: Бүгін Алматы қаласында белгілі қазақстандық актер, «Рэкетир» фильміндегі рөлі арқылы кеңінен танылған Мұрат Бисенбинмен қоштасу рәсімі өтті. Марқұмды соңғы сапарға шығарып салуға туған-туыстары мен жақындары, өнердегі әріптестері, музыканттар, әншілер және қала тұрғындары жиналды.
Мұрат Бисенбин қазақстандық кинематографияда өзіндік қолтаңбасын қалдырған актер еді. Ол «Рэкетир» фильміндегі рөлі арқылы көрерменнің ыстық ықыласына бөленіп, бұл туынды отандық кино тарихындағы культтік фильмдердің біріне айналды.
Еске сала кетейік, 2024 жылдың қыркүйек айында оған ұйқыбез қатерлі ісігі диагнозы қойылғаны белгілі болған еді. Жүргізілген ем-шараларға қарамастан, дерт асқынып, ауыр өтті.
Мұрат Бисенбиннің жарқын бейнесі мен өнері көрермен жадында, ал әріптестері мен жақындарының жүрегінде талантты актер әрі қазақстандық кино өнерінің айрықша тұлғасы ретінде мәңгі сақталады.
