STEPPENEWS.KZ: Беделді The Washington Post басылымы Маңғыстау облысының бірегей ландшафттарына назар аударды. Мақалада Қазақстандағы туристік локациялар Жібек жолының айға ұқсас пейзаждары ретінде сипатталған.
✍️ Материал авторы өңірге жасаған сапары туралы баяндап, шетелдік аудиторияның назарын Бозжыра, Торыш шатқалдары мен Жығылған ойпатының табиғи ерекшелігіне аударады.
«Торыш немесе Шарлар алқабы – ландшафт бойына уақ тастардан бастап ірі валундарға дейінгі жүздеген домалақ тастар шашырай орналасқан орын. Ғалымдар олардың қалай пайда болғаны жөнінде әлі күнге дейін ортақ пікірге келген жоқ. Ал мен бұл алқап бір кездері құдайлардың ойын бөлмесі болған деген жергілікті теорияны құптаймын.
Жығылған – ұзындығы бірнеше шақырымға созылатын, ғимараттармен шамалас тастарға толы ойпат. Алыстан қарағанда, бір кездері Каспий теңізінің жағасында алып біреу отырып, астындағы жерді ойып кеткендей әсер қалдырады», – деп жазады The Washington Post.
Материалда оқшауланған әрі аутентикалық саяхат тәжірибесіне ерекше мән беріледі.
Маңғыстау облысының танымдық туризм бағыты ретіндегі халықаралық тартымдылығы артып келеді. Бұл үрдіс өңірге келетін туристік ағынның өсуінен де байқалады.
