STEPPENEWS.KZ: Каспий жағалауына Қазақстанның Қызыл кітабына енген айрықша құстар — қызғылт қоқиқаздар қайта ұшып келді. Табиғаттың бұл әсем көрінісін жергілікті блогер Азамат Сәрсенбаев таспалап үлгерді.
Маңғыстау облысы — жыл құстарының маусымдық көші-қон жолындағы маңызды аялдамасы. Қоқиқаздар өңірде сәуір айының ортасына дейін тұрақтап, тынығады. Содан кейін олар ұя салып, балапан басу үшін Ақмола облысындағы Қорғалжын мемлекеттік табиғи қорығына қарай бағыт түзейді. Мамандардың айтуынша, бұл — жыл сайын қайталанатын табиғи процесс, сондықтан сирек кездесетін құстардың Батыс Қазақстан аспанында көрінуі — көктемнің алғашқы хабаршысы іспеттес.
