STEPPENEWS.KZ: Қазақстанда ХҚКО арқылы дайын болған құжаттарды кез келген уақытта — тіпті түнде немесе демалыс күндері де өз бетінше алуға мүмкіндік беретін постаматтар іске қосылды.
«Азаматтарға арналған үкімет» мемлекеттік корпорациясының хабарлауынша, бұл құрылғылар үзіліссіз және демалыссыз, тәулік бойы (24/7) жұмыс істейді. Құжатты алу үшін SMS арқылы келген жеке кодты енгізіп, биометриялық сәйкестендіруден өту қажет. Осыдан кейін ұяшық автоматты түрде ашылады.
Постаматтар қай жерде орналасқан?
Бүгінгі таңда еліміздің 10 өңірінде барлығы 14 постамат орнатылған. Олар арқылы мемлекеттік қызметтің 19 түрі бойынша нәтижелерді алуға болады, соның ішінде:
-
туылғаны, неке қию, некені бұзу және қайтыс болу туралы қайталанған куәліктер;
-
архивтік анықтамалар;
-
аттестат пен дипломдардың телнұсқалары.
2025 жылы бұл сервисті Семей, Тараз және Түркістан тұрғындары жиі пайдаланған.
Құжатты постамат арқылы қалай алуға болады?
-
ХҚКО-да қызметке тапсырыс беру кезінде құжатты алу тәсілін «постамат арқылы» деп таңдап, келісім беру керек.
-
Құжат дайын болған соң, коды бар SMS хабарлама келеді.
-
Құжатты үш күн ішінде алып кету қажет — әйтпесе ол ХҚКО-ға әдеттегі тәртіппен беру үшін қайтарылады.
2026 жылы бұл қызметтің құны 518 теңгені құрайды.
Постаматтары бар ХҚКО мекенжайлары:
-
Астана: Керей, Жәнібек хандар көш., 4; Республика даңғылы, 43.
-
Алматы: Медеу ауданы — Марков көш., 44; Әуезов ауданы — Жандосов көш., 51; Алатау ауданы — Нұркент м-ауданы, 5/17.
-
Шымкент: Әл-Фараби ауданы — Жангелдин көш., 13А; Қаратау ауданы — Төлеметов көш., 35.
-
Тараз: Төле би даңғылы, 89Ғ.
-
Қордай: Батыс тұрғын алабы, 25.
-
Қарағанды: Шахтерлер даңғылы, 5/2.
-
Қызылорда: Астана даңғылы, 46.
-
Павлодар: Павлов көш., 48.
-
Түркістан: 160-орам, 236-ғимарат.
-
Семей: Папанин көш., 34А.
Мемлекеттік корпорация өкілдері постаматтарды енгізу мемлекеттік қызметтерді алуды, әсіресе жұмыс уақытында ХҚКО-ға келе алмайтындар үшін әлдеқайда қолайлы ететінін атап өтті. Болашақта бұл сервисті кеңейту жоспарлануда.
