STEPPENEWS.KZ: Алматыда қала әкімі Дархан Сатыбалды мен Қазақстан Республикасының Төтенше жағдайлар министрі Шыңғыс Әріновтің қатысуымен азаматтық қорғау жүйесінің бірден екі маңызды нысаны салтанатты түрде ашылды. Атап айтқанда, «Shymbulak» тау-шаңғы курортына іргелес таулы аумақта орналасқан әмбебап құтқару бөлімшесі мен қаланың іскерлік құрылыс аймағындағы №15 өрт сөндіру бөлімшесі пайдалануға берілді.
Биік таулы аймақта жаңа құтқару бөлімшесінің ашылуы Мемлекет басшысы Қасым-Жомарт Тоқаевтың тапсырмаларын орындау аясында жүзеге асырылды. Президент туризмді дамыту кезінде азаматтардың қауіпсіздігі әрдайым бірінші орында тұруы тиіс екенін бірнеше рет атап өткен. Ұзақ үзілістен кейін алғаш рет таулы өңірдің күрделі табиғи және климаттық жағдайларына бейімделген мамандандырылған бөлімше іске қосылды.
Алматы 2025 жылы ең үздік туристік бағыттардың бірі ретінде танылды. Туристік ағынның артуы, тау бағыттарының дамуы мен курорттық инфрақұрылымның кеңеюі төтенше жағдайлардың алдын алу және жедел әрекет ету жүйесін күшейтуді талап етеді. Жаңа құтқару нысаны туристік аймақтағы қауіпсіздік деңгейін арттырып, қызметтердің жету уақытын едәуір қысқартуға мүмкіндік береді.
Өрт сөндіру және құтқару инфрақұрылымын дамытуға бағытталған жүйелі жұмыс аясында қалада №15 өрт сөндіру бөлімшесі де ашылды. Ол Алматының орталық бөлігін, соның ішінде Көктем-1, Көктем-2, Көктем-3, Алмагүл, Таугүл шағынаудандарын және бірқатар ірі тұрғын үй кешендерін өрттен қорғауды қамтамасыз етеді. Қызмет көрсету аумағында 30 мыңнан астам тұрғын мен 120-дан аса коммерциялық нысан бар.
Жаңа өрт сөндіру бөлімшесі алты техникаға арналған тұрақпен жабдықталған. Мұнда автоцистерналар, автосатылайтын баспалдақ және жедел көлік секілді заманауи техникалар бар. Бөлімшенің штаттық саны — 52 қызметкер, бұл тәулік бойы кезекшілік пен төтенше жағдайларға жедел әрекет етуге мүмкіндік береді.
Нысанды жобалау және салу барысында қызметкерлердің жұмыс жағдайына ерекше көңіл бөлінген. Ғимаратта әкімшілік-тұрмыстық блок, автономды инженерлік жүйелер, қауіпсіздік пен бейнебақылау жүйелері қарастырылған. Сонымен қатар жеке құрамды даярлау және қалпына келтіру үшін жаттығу залы, воркаут-аймақ және демалыс бөлмелері бар оқу-жаттығу орталығы құрылған.
Салтанатты іс-шара барысында қала әкімі өрт сөндіру және құтқару инфрақұрылымын дамыту қаланың қауіпсіздік саясатының маңызды бағыты екенін атап өтті.
«Қала тұрғындары мен қонақтарының қауіпсіздігі — біздің сөзсіз басымдығымыз. Біз таулы аумақтарда да, тұрғын аудандарда да өрт сөндіру және құтқару инфрақұрылымын жүйелі түрде дамытып келеміз. Көмек әрдайым жақын болуы, ал әрекет ету барынша жедел болуға тиіс», — деді Дархан Сатыбалды.
Қазіргі таңда Алматы қаласының қауіпсіздігін өртке қарсы қызметтің 20 бөлімшесі, сондай-ақ Құтқару қызметі, Республикалық жедел-құтқару жасағы, әскери бөлім, Апаттар медицинасы орталығының филиалдары және «Қазселденқорғау» күштері қамтамасыз етеді. Алайда қала әкімі атап өткендей, мегаполистің даму қарқынын ескерсек, бұл әлеуетті одан әрі арттыру қажет.
Дархан Сатыбалдының айтуынша, қолданыстағы нормативтерге сәйкес Алматыда кемінде 35 өрт сөндіру депосы болуы тиіс. Қала бұл көрсеткішке кезең-кезеңімен жақындап келеді. Бүгінге дейін екі әмбебап өрт сөндіру депосы іске қосылды, тағы екеуі ашылуға дайын. Ал осы жылдың соңына дейін Наурызбай ауданындағы Шұғыла шағынауданында алты шығу бағыты бар өрт сөндіру депосының құрылысын аяқтау жоспарланған.
Материалдық-техникалық базаны жаңартуға да ерекше көңіл бөлінуде. Қазіргі таңда қаладағы өрт сөндіру бөлімшелерінің жарағында 179 бірлік өрт сөндіру автотехникасы бар, бұл жарақтандыру деңгейінің 95 пайызға жеткенін көрсетеді. 2025 жылы жергілікті бюджет есебінен 33 бірлік өрт сөндіру және құтқару техникасы сатып алынды. Бұл — алдыңғы жылмен салыстырғанда айтарлықтай жоғары көрсеткіш.
Іс-шара соңында қала әкімі өрт сөндіру және құтқару қызметінің жеке құрамына кәсібилігі, ерлігі және әрдайым көмекке дайын екені үшін алғыс білдіріп, жаңа арнайы техниканың кілттерін табыстады. Сондай-ақ қызметкерлерге қауіпсіз еңбек пен қала игілігі жолындағы табысты жұмыс тіледі.
