Алматы қаласының Төтенше жағдайлар департаменті тұрғындар мен қала қонақтарына 4–5 шілде күндері тауға шықпауға кеңес берді деп хабарлайды SteppeNews.kz, Zakon.kz сайтына сілтеме жасап.
Синоптиктердің болжамына сәйкес, Алматыда қысқа мерзімді жаңбыр жауып, найзағай ойнайды және екпіні 20 м/с-қа дейін жететін қатты жел соғады.
Ал Іле Алатауының таулы аймақтарында нөсер жаңбыр, бұршақ және жылдамдығы 23–28 м/с болатын қатты жел күтіледі. Қатты жауын-шашынға байланысты сел жүру қаупі сақталады.
Құтқарушылар тұрғындарға автокөліктерін ағаштардың түбіне қоймауға, әлсіз бекітілген құрылымдардың маңынан аулақ жүруге және төтенше жағдайлар қызметтерінің ресми хабарламаларын бақылап отыруға кеңес береді.