2026 жылы Ташкент қолданбалы ғылымдар университеті (ТАФУ) UI GreenMetric Sustainable University Rankings халықаралық рейтингінде 968-орынға ие болып, әлемдік үздік 1000 университеттің қатарына енді. Сондай-ақ Өзбекстан университеттері арасында 36-орынға тұрақтады. Рейтингте оқу орындары қалдықтарды басқару, су ресурстарын сақтау, тұрақты көлік және ғылыми зерттеулерді қамтитын жеті бағыт бойынша бағаланады деп хабарлайды SteppeNews.kz gazeta.uz сайтына сілтеме жасап.
2026 жылы рейтингке 110 елден 2016 университет қатысты. Бұл – рейтинг тарихындағы рекордтық көрсеткіш. 2025 жылы қатысушы оқу орындарының саны 1745 болған. Қатысушылар санының артуына қарамастан, Ташкент қолданбалы ғылымдар университеті өз позициясын жақсартып, әлемдік үздік 1000 университеттің қатарына қосылды.
«Қазіргі университет үшін тұрақты даму жеке жұмыс бағыты ғана емес, жалпы стратегияның маңызды бөлігіне айналды. Біз қолайлы әрі экологиялық жауапты университет ортасын қалыптастырумен қатар, студенттердің ресурстар мен қоршаған ортаға ұқыпты қарау әрқайсымыздың жауапкершілігіміз екенін түсінуіне мән береміз. ТАФУ-дың UI GreenMetric рейтингінде әлемдік үздік 1000 университет қатарына енуі дұрыс бағытта келе жатқанымызды көрсетеді. Бұл біз үшін маңызды нәтиже ғана емес, сонымен қатар экологиялық бастамаларды жалғастырып, университеттің тұрақты даму стандарттарын біртіндеп жетілдіруге ынталандыратын қадам», – деді Ташкент қолданбалы ғылымдар университетінің ректоры Абдусалом Вахитович Умаров.
2010 жылы құрылған UI GreenMetric рейтингі университеттерді 60 көрсеткіш бойынша бағалайды. Олар жеті негізгі санатқа біріктірілген. Ташкент қолданбалы ғылымдар университеті су ресурстарын сақтау, қалдықтарды басқару, тұрақты көлік және тұрақты даму саласындағы академиялық зерттеулер бағыттары бойынша жоғары нәтижелер көрсетті.
Алдағы уақытта университет экологиялық бастамаларды кеңейтуді, энергия тиімділігін арттыратын шешімдерді енгізуді және студенттер мен қызметкерлерге арналған экологиялық білім беруді дамытуды жоспарлап отыр. Бұл қадамдар оқу орнының халықаралық рейтингтегі позициясын нығайтуға бағытталған.
Келесі материал: Қазақстан Азияның мәдени мұраны қорғау альянсында бақылаушы мәртебесін алды