Өзбекстан студенттері Google Gemini AI Plus жазылымын бір жыл тегін пайдалана алады

Өзбекстандық студенттер Aileaders.uz платформасы арқылы Google Gemini AI Plus жазылымын бір жыл бойы тегін пайдалану мүмкіндігіне ие болды. Құны 60 АҚШ долларына тең қызметке қол жеткізу үшін студенттер SheerID халықаралық верификация жүйесі арқылы өз мәртебесін растауы қажет, деп хабарлайды SteppeNews.kz Өзбекстан Республикасының Цифрлық технологиялар министрлігіне сілтеме жасап. 

Бұл мүмкіндік Өзбекстанның Цифрлық технологиялар министрлігі мен Google компаниясының ынтымақтастығы аясында іске асырылды. Google-дың халықаралық верификация жөніндегі серіктесі SheerID Өзбекстанды студенттерді тексеруге қолдау көрсетілетін елдер тізіміне қосты.

Google Gemini AI Plus жазылымы қандай мүмкіндіктер береді?

Жазылым жасанды интеллект құралдарын оқу, зерттеу және шығармашылық жұмыстарда пайдалануға мүмкіндік береді. Пайдаланушыларға Google қызметтерінің бірқатар қосымша функциялары ұсынылады.

Олардың қатарында:

• Gemini — қолданбаны пайдалану лимиттерінің артуы және озық жасанды интеллект модельдеріне қол жеткізу;
• 400 ГБ бұлтты сақтау орны — Google Drive, Google Photos және Gmail қызметтеріне ортақ кеңейтілген жады;
• Google Flow — генеративті жасанды интеллект көмегімен кинематографиялық көріністер мен оқиғалар жасау құралдары;
• Gmail ішіндегі Gemini — электрондық пошта қызметінде жасанды интеллект мүмкіндіктерін тікелей пайдалану;
• NotebookLM — аудио және бейнематериалдармен жұмыс істеу, олардың мазмұнын қысқаша баяндау және тест тапсырмаларын әзірлеу сияқты зерттеу құралдары;
• AI музыкалық студиясы — жасанды интеллект көмегімен музыка жасауға арналған қосымша мүмкіндіктер.

Тегін жазылымды қалай алуға болады?

Жазылымды алу үшін студенттер Aileaders.uz платформасына кіріп, SheerID жүйесі арқылы студенттік мәртебесін растауы қажет. Верификациядан сәтті өткеннен кейін олар Google Gemini AI Plus қызметін бір жыл бойы тегін пайдалана алады.

Сонымен қатар Aileaders.uz платформасында әлемнің жетекші компаниялары ұсынған жасанды интеллект бойынша 100-ден астам халықаралық курсты тегін оқуға мүмкіндік бар.

Бұдан бөлек, студенттерге AI технологияларын пайдаланып, өз жобалары мен стартаптарын дамыту үшін Startupbase.uz платформасын қолдану ұсынылады.