Қазақстанда көлік инфрақұрылымын дамытудың жаңа тарихи кезеңі басталды. Alatau City арнайы экономикалық аймағында Орталық Азияда тұңғыш рет заманауи технологиялар мен болашақ көліктерінің таныстырылымы өтті. Ауқымды шара барысында қала аспанында ұшатын инновациялық аппараттар көпшілікке көрсетіліп, Орталық Азиядағы қалалық әуе ұтқырлығының (Urban Air Mobility, UAM) негізі қаланды.
Іс-шараның басты кейіпкері — қытайлық AutoFlight компаниясының eVTOL (электрлік тік ұшып-қону аппараты) аэротаксиінің үлгісі болды. Бұл аппарат бір пилот пен бес жолаушыға арналған, 13 электромотормен жабдықталған және ешқандай көмірқышқыл газын шығармайды. Сағатына 200 шақырым жылдамдықпен ұшып, қашықтықты лезде бағындыруға қабілетті бұл көлік түрі қалалық логистиканы түбегейлі өзгертуге бағытталған.
Жоба аясында тек әуе таксиін сыннан өткізіп қана қоймай, болашақтың әуе айлақтары мен вертипорттарын салу да қолға алынбақ. Бұл бағытта корейлік «Korea Airports Corporation» және итальяндық «UrbanV» компанияларының тәжірибелі мамандарымен тығыз серіктестік орнатылды. Халықаралық әріптестік арқасында Alatau City аумағында UAM Center Eurasia орталығының жобасы жүзеге асырыла бастады. Жоспар бойынша, алдағы уақытта Alatau City, Алматы әуежайы және Алматы облысының туристік локациялары арасында арнайы вертипорттар желісі салынбақ. Мәселен, алматылық әуежайдан Медеуге немесе Alatau City-ге дейінгі жол небәрі 10-12 минутты алады деп күтілуде.
Сонымен қатар іс-шара барысында «Keeta Drone» компаниясының дрон арқылы тауар жеткізу терминалдары да таныстырылды. Пайдаланушылар қосымша арқылы тапсырыс беріп, қалалық постаматтар арқылы қажетті заттарын немесе тамағын дрондар арқылы жылдам қабылдай алады.
Бұл ауқымды бастама тек көлік кептелісі мәселесін шешіп қана қоймай, өңірдің экологиялық жағдайы мен инвестициялық тартымдылығын арттыруға зор үлес қоспек. Жеке инвестициялар есебінен жүзеге асырылып жатқан жоба ел экономикасы мен туризм саласын жаңа сапалық деңгейге көтермек. Қазақстанның жаңа қаласы озық технологиялардың орталығына айналып, аспан астындағы сапарлардың шынайы өмірге енетін күні де алыс емес.
Келесі материал: Тоқаев Көшпенділер ойындарының жеңімпаздарын марапаттады
Посмотреть эту публикацию в Instagram