Қытайдың Шыңжаң өңірінде шөлейттенумен күрестің жарқын үлгісіне айналған Кекия тәжірибесі бүгінде Тарым өзені бойында жалғасып жатыр. Биыл Кекия шөлін көгалдандыру жобасының басталғанына 40 жыл толып отыр, деп хабарлайды SteppeNews.kz.
2023 жылдан бері Бай ауданында Тарым өзенінің негізгі арнасын кешенді экологиялық қалпына келтіру жобасы жүзеге асырылуда. Осы уақыт ішінде бұрынғы шөлейтті аумақта 3 мың гектардан астам жасанды орман өсірілді.
Жоба Кекияда қалыптасқан тәжірибеге сүйеніп, су ресурстарын үнемді пайдалануға басымдық береді. Суару қолданыстағы каналдар арқылы жүргізіліп, тамшылатып суару технологиясы енгізілген. Сонымен қатар тұзға төзімді ауыл шаруашылығы дақылдары мен жергілікті климатқа бейім жеміс ағаштары отырғызылып, экологиялық қалпына келтіру мен ауыл шаруашылығын қатар дамытуға мүмкіндік жасалған.
Жоба өңірдегі халықтың әл-ауқатын арттыруға да ықпал етіп отыр. Орман отырғызу және көшеттерді күтіп-баптау жұмыстары жыл сайын мыңнан астам адамды маусымдық жұмыспен қамтиды. Жергілікті тұрғындар тәулігіне 120–150 юань көлемінде табыс тауып, маусымдық жұмыстардан жылына 40–50 мың юаньға дейін кіріс таба алады.
Сонымен қатар жеке инвесторлар өңірде жеміс бақтарын және дәрілік өсімдіктер өсіретін шаруашылықтарды дамытып, ауыл шаруашылығы өнімдерін өңдеу өндірісін жолға қойған. Бұл экологиялық жобалардың экономикалық тиімділігін арттырып, ауыл тұрғындарының тұрақты табыс көзін қалыптастыруға мүмкіндік беріп отыр.
Жергілікті билік алдағы уақытта агротуризм мен экологиялық туризм бағыттарын дамытып, өңірдің табиғи әлеуетін халық игілігіне пайдалануды жоспарлап отыр. Осылайша Кекия тәжірибесі шөлейттенумен күрес қана емес, табиғатты қорғау мен халықтың әл-ауқатын қатар арттырудың тиімді үлгісі ретінде дамуын жалғастыруда.