Алматыда жойқын жер сілкінісі туралы халықты ерте автоматты түрде ескерту жүйесін дамыту жұмыстары жалғасып жатыр, деп хабарлайды SteppeNews.kz Алматы қаласы әкімдігінің баспасөз қызметіне сілтеме жасап.
Қаладағы 40 нысанның орналасу орны анықталып, олардың 35-інде сейсмикалық станциялар салынды. Жаңа нысандар қолданыстағы бақылау желісіне қосылып, жер сілкіністерін бақылау ауқымын кеңейтіп, күшті сейсмикалық оқиғалар туралы ақпаратты жедел алуға мүмкіндік береді.
2025 жылдан бері Алматы агломерациясында жер сілкінісін ерте анықтауға арналған 70 автоматтандырылған станция орнату жұмыстары жүргізілуде. Қазір Алматы облысында 65 станция салынса, қалған бес нысанды жыл соңына дейін аяқтау жоспарланған.
Сонымен қатар қалада Mass Alert жедел хабарлау жүйесі енгізіліп, Алматы агломерациясының сейсмогеодинамикалық жағдайын зерттеуге бағытталған ғылыми жоба жүзеге асырылып жатыр. Сондай-ақ 2026–2035 жылдарға арналған ғимараттардың сейсмикалық төзімділігін арттыру жоспары бекітілді.
Мамандар әлеуметтік желілерде тараған жойқын жер сілкінісі туралы ақпараттың шындыққа сәйкес келмейтінін атап өтті. Олардың мәліметінше, Алматыда күшті жер сілкінісінің жақындағанын көрсететін аномальды сейсмикалық өзгерістер тіркелмеген. Дегенмен тұрғындарға дабыл шабаданын алдын ала дайындап, қауіпсіздік ережелерін сақтауға кеңес берілді.