SteppeNews.kz: Алматыда бірнеше әйел қоғамдық орында бет-әлпетін тасалайтын киім кигені үшін әкімшілік жауапкершілікке тартылды. Бұл туралы қалалық полиция департаменті мәлімдеді.
Құқық бұзушылық әлеуметтік желілерге мониторинг жүргізу барысында анықталды. Тәртіп сақшыларының назарына ер адамның қоғамдық орында бетін жапқан әйелдермен бірге жүрген видеоролигі іліккен.
Полицияның нақтылауынша, тексеру жұмыстары видеоның қойылымдық сипатта болғанын және коммерциялық түсірілім аясында түсірілгенін көрсетті. Дегенмен, бұған қарамастан, кейбір қатысушылардың іс-әрекетінен адамның кім екенін тануға кедергі келтіретін киім киюге қатысты әкімшілік құқық бұзушылық белгілері табылды.
Нәтижесінде кінәлілерге ескерту жасалды. Сондай-ақ қатысушылармен профилактикалық әңгіме жүргізіліп, заңнама талаптары түсіндірілді.
Департамент өкілдері қоғамдық орындарда болу мақсатына қарамастан, белгіленген нормаларды сақтау барлық азаматтар үшін міндетті екенін ескертті.
Айта кетейік, 2025 жылғы 30 маусымда құқық бұзушылықтың алдын алу саласына өзгерістер енгізетін заңға қол қойылған болатын. Атап айтқанда, ол қоғамдық орындарда бет-әлпетті жасыратын киім киюге тыйым салады. Тек медициналық көрсеткіштер, ауа райы жағдайлары, сондай-ақ қызметтік немесе еңбек міндеттерін орындау жағдайларында ғана ерекшеліктер қарастырылған.
