STEPPENEWS.KZ: Мемлекет басшысы министрліктің атқарған жұмысы мен ғылым және жоғары білім саласындағы негізгі бастамалар туралы есепті тыңдады.
Министр елде адами капиталды дамыту және таланттарды басқару жүйесін енгізу бағытында жұмыстар жүргізіліп жатқанын айтты. Сонымен қатар еңбек нарығына жүргізілген зерттеу нәтижелері мен 2030 жылға дейінгі кадрларға деген сұраныс болжамы таныстырылды.
Саясат Нұрбек жоғары білімге қолжетімділікті кеңейту шараларына да тоқталды. Оның ішінде «Келешек» тетігін іске қосу және саланы қаржыландырудың жаңа үлгісін енгізу қарастырылған.
Жобалар қатарында AI-Sana қозғалысын дамыту және оқу мен өндірісте жасанды интеллект қолданылатын AI-Enabled University құру жоспарланып отыр. Сондай-ақ ғылыми кластерлер мен ғылым қалашықтарын қалыптастыру көзделген.
Министрдің айтуынша, елімізде DeepTech пен күрделі өндірістерді дамытуға көшу жүріп жатыр. Бұл бағытта жоғары оқу орындары мен жергілікті әкімдіктердің өзара байланысы маңызды рөл атқарады – технологиялық міндеттерді шешу және жаңа өндірістерді іске қосу үшін.
Бұдан бөлек, ғылым саласындағы реформалар жалғасуда. Мемлекет ғалымдарды гранттармен, тағылымдамалармен, сыйақылармен және тұрғын үймен қамтамасыз ету бағдарламалары арқылы қолдап келеді.
Кездесу қорытындысы бойынша Президент жоғары білім сапасын арттыру, ғылыми зерттеулер мен оларды коммерцияландыруды дамыту, сондай-ақ шетелдік жоғары оқу орындарының филиалдарының жұмысын күшейту жөнінде бірқатар тапсырма берді.
