STEPPENEWS.KZ: Шымкент қаласында кәмелетке толмаған екі баланың жақын туысы тарапынан ұзақ уақыт бойы жыныстық сипаттағы зорлық-зомбылыққа ұшырағаны туралы ақпарат тарады. Құқық қорғаушылар мен полиция департаменті аталған дерек бойынша тергеу амалдарын бастап, оқиғаның мән-жайын анықтауға кірісті.
Бұл сұмдық жағдай туралы құқық қорғаушы Ләззат Рақышева өзіне «Human Rights Lawyers» қоры арқылы хабарласқан жәбірленуші ананың арызынан кейін мәлімдеді. Әйелдің айтуынша, ол перзентханада жатқан кезде тоғыз жастағы ұлын сеніп тапсырып, туыстарының үйіне қалдырып кеткен. Алайда анасы жоқ кезде бала жақын адамынан зардап шеккен. Ләззат Рақышева бұл жағдайға қатысты:
«Дәл осы күндері туыстарының бірі баланы қатарынан үш күн бойы зорлаған. Сондай-ақ кеше сол ер адам екінші әпкесінің ұлын да шамамен бес күн бойы зорлағаны белгілі болды», — деп жазды.
Полиция департаментінің ресми хабарламасына сәйкес, аталмыш дерек бойынша қылмыстық іс қозғалып, тиісті есепке алынды. Тергеу барысында анықталғандай, арызда көрсетілген бұл ауыр оқиғалар осыдан бірнеше жыл бұрын, нақтырақ айтқанда 2021 жылы орын алған көрінеді.
Қазіргі таңда тәртіп сақшылары тергеу аясында барлық куәгерлерден жауап алып, қажетті сараптамалар мен тергеу іс-қимылдарын жүргізіп жатыр. Құзырлы орган өкілдері істің ерекше бақылауда екенін және заң шеңберінде тиісті шешім қабылданатынын атап өтті. Жәбірленуші тарап қылмыскердің тиісті жазасын алуын талап етіп отыр.
