STEPPENEWS.KZ: BAE Systems әуе тасымалдаушының 6,86% акциясына ие және бүкіл пакетті нарықтық бағадан шамамен 15% жеңілдікпен сатуды жоспарлап отыр: бір депозитарлық қолхат үшін шамамен $5,1 деңгейінде. 18 наурыздағы сауда қорытындысы бойынша, Air Astana акциялары тарихи минимумға дейін төмендеп, -5,74% (707,6 теңге) болды.
Qazaq Expert Club-тың тең құрылтайшысы, экономист Бауржан Шурманов BAE Systems-тің Air Astana капиталынан шығуы компанияның болашақ көрсеткіштері мен операциясына қалай әсер ететінін түсіндірді.
«Бұл 20 жылдан астам уақытқа созылған инвестициялық циклдің логикалық аяқталуы. BAE Systems Air Astana құрылу кезінде негізгі серіктес болды және компанияның корпоративтік басқаруы мен халықаралық беделінің қалыптасуына шешуші үлес қосты. IPO және кейінгі орналастырулардан кейін олардың әрі қарай қатысуы стратегиялық мәнін жоғалтты», – дейді сарапшы.
Оның айтуынша, бұл – бизнестегі қиындықтың белгісі емес, қаржылық инвестордың классикалық шығуы (exit). Алайда шығу формасы маңызды.
«Ірі пакетті жеңілдікпен сату қысқа мерзімде акция бағасына қысым жасап, құбылмалылықты арттырады. Қосымша фактор – нарықтағы ұсыныстың өсуі, өйткені бүкіл пакет институционалдық инвесторларға ұсынылады», – дейді Шурманов.
Экономистің пікірінше, Air Astana үшін бұл мәміле тікелей операциялық әсер бермейді: компания жаңа капитал тартпайды, басқару құрылымы өзгермейді.
«Дегенмен, жанама әсерлер бар. Бір жағынан, компания шетелдік ірі инвестор факторынан айырылады, ол бұрын халықаралық нарықтағы сенімділікті күшейтіп келген. Екінші жағынан, еркін айналымдағы акциялар үлесі (free float) артады. Free float-тың өсуі – бұрын өтімділігі шектеулі болған жаңа институционалдық инвесторларға мүмкіндік. Ұзақ мерзімде бұл акционерлік базаның сапасын жақсартып, компанияны нарықтық тұрғыда тиімді етеді», – деп атап өтті Шурманов.
Сондай-ақ, сарапшы BAE Systems-тің шығуы Air Astana уақытша осал кезеңге сәйкес келгенін ескертті – Таяу Шығыстағы оқиғалар және Pratt&Whitney қозғалтқыштарымен байланысты мәселелер компанияның пайдасы мен операциялық көрсеткіштеріне әсер етіп отыр.
«Нәтижесінде нарыққа әсер әртүрлі болады: қысқа мерзімде – жеңілдік пен ұсыныстың өсуінен теріс, орта мерзімде – бейтарап, өйткені бизнес негізі өзгермейді, ал ұзақ мерзімде – біршама оң, егер free float артуы инвесторлар базасының кеңеюіне және әділ нарықтық бағалауға алып келсе», – деп қорытындылады экономист.
