STEPPENEWS.KZ: Абай облысының полицейлері Халықаралық әйелдер күні қарсаңында интернет-алаяқтардың қатты белсенділік танытып жатқанын ескертеді. Мерекелік қарбаласты пайдаланған қаскөйлер азаматтарды алдаудың түрлі айла-тәсілдерін іске асыруда.
Мереке жақындаған сайын «гүл шоғын жеткізу», «сыйлық ұтысы» немесе «курьер үшін SMS-кодты айту» сияқты қоңыраулар мен хабарламалар көбейеді. Тәртіп сақшыларының айтуынша, алаяқтар көбіне курьер немесе банк қызметкері ретінде хабарласып, телефонға келген растау кодын сұрайды. Алайда банк өкілдері мен ресми жеткізу қызметтері ешқашан мұндай құпия мәліметтерді телефон арқылы талап етпейтінін есте сақтау қажет екенін ескертеді. Кодты бөгде адамға айту — шотыңыздағы қаражаттан айырылумен тең.
Сонымен қатар, әлеуметтік желілердегі күмәнді дүкендер де үлкен қауіп төндіреді. Алаяқтар тауар бағасын әдейі төмендетіп көрсетіп, фейк парақшалар арқылы алдын ала төлем жасауды талап етеді. Ақша аударылғаннан кейін сатушылар байланысқа шықпай, жоқ болып кетеді. Сондықтан тауарды тек тексерілген дүкендерден тапсырыс беру және белгісіз шоттарға аударым жасамау ұсынылады.
Полиция департаменті күмәнді сілтемелерге өтпеуге, жеке мәліметтерді жарияламауға және «тегін сыйлықтар» туралы уәделерге сенбеуге шақырады. Егер сіз алаяқтық әрекеттерге тап болсаңыз, дереу 102 нөміріне хабарласуыңыз қажет. Алдағы ұзақ демалыс күндерінде сақ болып, мерекелік көңіл-күйді сақтау маңызды.
