STEPPENEWS.KZ: Ақтөбе қаласының №2 сотында Омар Амантаев есімімен танымал рэп-орындаушы Qarakesek-ке қатысты қылмыстық істі қарау басталды. Оған есірткі құралдарымен немесе психотроптық заттармен өткізу мақсатынсыз заңсыз жұмыс істегені үшін айып тағылып отыр.
Бұл оқиға өткен жылдың жазында басталған болатын. Сол кезде полиция қызметкерлері 31 жастағы әртісті көлікті есірткіге мас күйінде басқарғаны үшін ұстаған еді. Медициналық сараптама нәтижесінен соң, сот оны 15 тәулікке әкімшілік қамауға алып, жеті жылға көлік жүргізу құқығынан айырған болатын. Алайда тексеру кезінде одан ұнтақ зат салынған пакет табылып, бұл әрекеті қылмыстық сипат алды.
Қазіргі уақытта сотталушы іс материалдарымен толық танысып шықты. Заң талаптарына сай, Ақтөбе облыстық адвокаттар алқасынан оған арнайы қорғаушы тағайындалды. Енді сот шешіміне байланысты орындаушыға 865 мың теңге айыппұл салынуы немесе 50 тәулікке дейін қамауға алынуы мүмкін.
Айта кетейік, Qarakesek – қазақ тілді рэп бағытындағы ең танымал өнерпаздардың бірі. Оның YouTube арнасындағы «Қураған гүл» және «Көбелек» сияқты туындылары миллиондаған қаралым жинап, тыңдармандар арасында үлкен сұранысқа ие.
