STEPPPENEWS.KZ: Еңбек және халықты әлеуметтік қорғау министрлігінің деректеріне сәйкес, 2025 жылы жұмысынан айырылғаны үшін жәрдемақыны 354 мыңнан астам адам алған. Төленген қаражаттың жалпы көлемі 130,4 млрд теңгені құрады.
Жұмыстан босатылғаннан кейін жәрдемақы 1 айдан 6 айға дейін тағайындалады. Төлем мерзімі еңбек өтіліне және бұрынғы жалақы мөлшеріне байланысты. Жәрдемақы көлемі жоғалтқан табыстың 45%-ына дейін жетуі мүмкін. Қаражат Мемлекеттік әлеуметтік сақтандыру қорынан төленеді.
2026 жылы жәрдемақы алу үшін eGov.kz порталына кіріп, жұмыс іздеуші ретінде тіркеліп, ЭЦҚ арқылы онлайн өтінім беру қажет.
Өтінім берілген күні-ақ мансап орталығы бос жұмыс орындарын ұсынады. Егер лайықты жұмыс табылмаса, бірнеше күннен кейін азаматқа жұмыссыз мәртебесі беріліп, жәрдемақы тағайындалады.
Сондай-ақ төлемді enbek.kz сайты арқылы рәсімдеуге болады. Егер адам бұрыннан жұмыссыз ретінде тіркелген болса, оған SMS хабарлама келуі мүмкін. Хабарламаға жауап беру жеткілікті — жәрдемақы автоматты түрде рәсімделеді.
