STEPPENEWS.KZ: Әлем бойынша күн сайын 40 миллионнан астам адам ChatGPT-ден денсаулық жайлы ақпарат сұрайды. Чатботқа жолданатын барлық сауалдардың 5 пайыздан астамы медициналық тақырыптарға қатысты.
OpenAI дерегіне сәйкес, ChatGPT аптасына миллиардтаған денсаулыққа байланысты сұрақты өңдейді. Қазіргі таңда сервистің 800 миллионнан астам тұрақты қолданушысы бар, олардың шамамен төрттен бірі денсаулық мәселесіне қатысты кеңес алады.
Компания өкілдері жасанды интеллект дәрігерді немесе медициналық мекемелерді алмастырмайтынын атап өтеді. Дегенмен, ChatGPT медициналық ақпаратты түсіндіруге, емдеу жолдарына дайындалуға және медицинаға қолжетімділікті арттыруға көмектесетін құрал ретінде қарастырылады.
АҚШ-та ChatGPT біртіндеп пациенттер мен медицина қызметкерлері үшін пайдалы көмекшіге айналып келеді. Бұған дейін жүргізілген зерттеулердің бірінде дәрігерлердің едәуір бөлігі жұмыс барысында жасанды интеллект құралдарын қолданғаны анықталған.
Сондай-ақ, жүйе ауруханалар мен дәрігерлер жетіспейтін ауылдық аймақтарда ерекше сұранысқа ие. Мұндай өңірлерден ChatGPT-ге аптасына жүздеген мың медициналық сауал жолданады.
Сауалнама нәтижесі бойынша, пайдаланушылардың 55 пайызы симптомдарды анықтау үшін, 48 пайызы медициналық терминдерді түсіну мақсатында, ал 44 пайызы емдеу нұсқалары жайлы ақпарат алу үшін жасанды интеллектке жүгінген.
