18–19 қазан күндері Алматыда өткен VI Халықаралық түркітілдес журналистер медиа форумы 10-нан астам елден келген 300-ге жуық журналист, медиа менеджер және сарапшыны бір алаңға жинады. Биылғы форумның басты мақсаты – ортақ түркі медиа кеңістігін дамыту және ақпараттық қауіпсіздікті жаңа деңгейге көтеру.
Түркітілдес журналистер қорының президенті Нәзия Жоямергенқызы соңғы үш жылда қор 20-дан астам халықаралық жоба ұйымдастырғанын, алайда түркі елдері арасындағы ақпараттық алшақтық әлі де 30–40 пайыз деңгейінде сақталып отырғанын атап өтті. Осы олқылықты жою үшін форумда ортақ медиа платформалар құру, бірлескен деректі фильмдер шығару және журналистердің кәсіби алмасу бағдарламаларын кеңейту ұсынылды. Брюссельде құрылған Дүниежүзілік Түркі Медиа Ассоциациясының биылғы жылы мүшелер саны 12-ге жеткені де айтылды.
Форумның ең қызу талқыланған тақырыбы — жасанды интеллект. Сарапшы Мейіржан Әуелханұлы Қазақстанда жаңа қабылданған «ЖИ дамыту туралы» заң медиа саласындағы цифрлық өзгерістерді жылдамдататынын жеткізді. Қанат Есіркеповтің дерегінше, ЖИ қолданған редакциялар контент өндіру жылдамдығын 35–40% арттырған. Ал қазақ тіліндегі KazLLM моделін әзірлеу үшін 150 миллиардтан астам токен, соның ішінде ҚазҰУ кітапханасының 8000 кітабы цифрландырылғаны форум қонақтарының қызығушылығын тудырды.
Форумның екінші күнінде әр жылы ұйымдастырылатын Тоғызқұмалақ турниріне еліміздің әр өңірінен және шетелден келген 40-қа жуық журналист қатысты. Ойын ерлер және әйелдер арасында бөлек өтті. Жарыс нәтижесінде қыздар арасында бірінші орынды Гүлжан Қызайбай, ерлер арасында Sportpress.kz өкілі Нұрлан Құмар жеңіп алды. Турнирге алғаш қатысқан 15-тен астам шетелдік қонақ тоғызқұмалақты осы форумда алғаш рет үйреніп шықты.
Жалпы, медиа форумы кәсіби диалог пен рухани байланысты күшейтіп, түркі әлемінің ақпараттық интеграциясын нақты деректермен және жаңа жобалармен бекіте түсті.
Дария ЯХИА