Ақмола облысының тұрғындары өзін дәрігер ретінде таныстырған алаяқтарға сеніп, миллиондаған теңгесінен айырылды.
Облыстық полиция департаментінің мәліметінше, өңірдегі CyberPol бөлімшесі медициналық қызметкерлердің атынан жасалған қоңырауларға байланысты екі алаяқтық істі тергеп жатыр.
Полиция алаңдаушылық білдіріп отыр, мұндай алдау тәсілдері қылмыскерлер арасында барған сайын жиілеп барады, ал азаматтар мұның қастандық екенін байқамай жатады.
Жедел уәкілдердің ақпаратына сәйкес, алаяқтардың құрбандарының бірі – Көкшетау қаласының 64 жастағы тұрғыны.
14 қазанда оған орталық емхананың қызметкерлері болып танысқан бейтаныс адамдар телефон шалып, екпе алу қажеттігін айтып, кезекке тұру үшін SMS-код сұраған.
«Көкшетаулық тұрғын кодты айтып қойғаннан кейін, кибералаяқтардың шабуылына ұшырады. Олар өздерін Қаржылық бақылау департаменті мен eGov қызметкерлері ретінде таныстырып, түрлі алдау амалдарын қолданып, жәбірленушінің 9 миллион 710 мың теңгесін иемденіп кеткен», — деп мәлімдеді Ақмола облыстық полиция департаменті.
Осындай жағдай Щучинск қаласының тұрғынының да басынан өткен. Өзін медицина қызметкері ретінде таныстырған алаяқтар оған медициналық тексеруден өту қажет екенін айтып, SMS арқылы келген кодты алдап алған.
«Кейін қылмыскерлер ақшаны «қауіпсіз шотқа аудару керек» деген сылтаумен ер адамды алдап, доллар мен еуромен есептегенде 55 миллион теңгені шетелдік есепшоттарға аудартқан», — деді ведомстводан.
Қазіргі таңда екі дерек бойынша сотқа дейінгі тергеу амалдары жүргізіліп жатыр.
