Марат Жекенов – қысы қытымыр, жазы аптап Астанада көшелердің тазалығын сақтап жүрген еңбек адамдарының бірі. Ол коммуналдық техниканы жүргізеді және жұмыс күні 10 сағаттық аусымнан тұрады. Жолдың әр шақырымы оның табанды еңбегімен тазарып отырады.
Ал оның құрақ құрайтын ерекше хоббиі көпшілікті таңғалдырған. Бұл өнерге алғаш болып жұбайы әуестеген екен. Немерелеріне арнап жасау тігіп берсем деген тілекпен басталған қызығушылық бүгінде тұтас бір отбасылық кәсіпке айналды.
– Күнде жұмыстан келгенде тігін машинасы зырылдап тұрады. Кемпіріме көмектесіп жүріп, мен де бос отырмайын деп іске кірісемін, содан үйреніп кеттім. Жұмыстағы көліктің шуынан осылай демаламын. Алғашында әріптестерім таңғалған. Қазір тапсырыс беретіндері де бар. Осылайша сүйікті хобби кішігірім табыс көзіне айналды, – дейді М.Жекенов.
Марат Жекеновтың зейнетке шығуына бір-ақ жыл қалды. Алдағы арманы – кішігірім отбасылық кәсібін кеңейтіп, тігін цехын ашу.
Еске сала кетейік, Астанада Жұмысшы мамандықтар аллеясы ашылды.