Қытайлық компания Қазақстанда 600 млн АҚШ долларына қалдықтарды кәдеге жарату зауыттарын салуды жоспарлап отыр.
Жобаларға қолдау көрсетіледі
«KAZAKH INVEST» ҰК» АҚ баспасөз қызметінің мәліметінше компанияның басқарма төрағасының орынбасары Азамат Қожанов пен Қытайдың Hunan Junxin Environmental Protection компаниясы директорлар кеңесінің төрағасы Дай Даого кездесу өткізді.
«Тараптар Қазақстанда қалдықтарды энергияға айналдыру бойынша үш зауыт салуды көздейтін кешенді жобаны жүзеге асыру мүмкіндігін талқылады. Жалпы инвестиция көлемі 600 миллион АҚШ долларын құрайды», — деп жазылған хабарламада.
Hunan Junxin Environmental Protection компаниясы Бішкекте осындай жобаны жүзеге асыруда және Қытайдағы жетекші жеке экологиялық компаниялардың бірі саналады. Компания WtE (waste-to-energy) кешендерін салу мен пайдалануға маманданған, 400-ден астам патентке ие және Орталық Азия нарығында белсенді жұмыс істейді.
Кездесу барысында Азамат Қожанов қытайлық жобаларға жан-жақты қолдау көрсетуге дайын екенін жеткізді. Сондай-ақ ол Қазақстан үшін экологиялық әсері, технологиялардың жергіліктендірілуі және орнықты энергия генерациясы бар ауқымды шешімдер маңызды екенін атап өтті.
«Біз халықаралық үздік стандарттарға сәйкес экологиялық жобаларды бірлесіп іске асыруға жоғары әлеует бар деп санаймыз. Junxin-нің Қытай мен Қырғызстанда табысты жүзеге асырылған жобаларды қоса алғанда мол тәжірибесі бар және ол біздің қалаларымызда «жасыл» инфрақұрылымды дамытуға үлес қоса алады», — деді ол.
Инновациялық тәсіл енгізіледі
Ал Дай Даого жоба тек өңдеу қуаттарын ғана емес, тұтас технологиялық экожүйені құруды көздейтінін атап өтті. Оның айтуынша, тұрмыстық қалдықтарды жағу арқылы алынатын энергиямен жұмыс істейтін жасыл деректер орталықтарын салу, кадрлар даярлау орталықтарын құру және қалдықтарды басқарудың интеллектуалды жүйелерін енгізу жоспарланған.
«Біздің мақсатымыз – тек зауыт салу емес, ТҚҚ-мен жұмыс істеуге инновациялық тәсіл енгізу. Біз Қазақстанға өңдеуді, энергия өндіруді және цифрландыруды біріктіретін технологияларды әкелгіміз келеді. Бұл өңірдің орнықты дамуы мен экологиялық қауіпсіздігіне елеулі үлес болады деп сенемін», — деді ол.